पुणे : कोविड-१९ या महामारीच्या पार्श्वभूमीवर जगभरातील ४२ देशांतून, अमेरिकेतील २१ राज्यांतून आणि महाराष्ट्रासह भारतातील १२ राज्यांतून एकाच वेळी अनेक मराठी भाषक एकत्र येत आहेत. २५ मे २०२० रोजी ते सोशल मीडियावर कोविड-१९च्या संबंधाने महाजागर करणार आहेत. विश्व मराठी परिषदेच्या वतीने आयोजित करण्यात आलेल्या या अभिनव उपक्रमाचे नेतृत्व ‘बृहन्महाराष्ट्र मंडळ ऑफ नॉर्थ अमेरिका’च्या अध्यक्ष विद्या जोशी करणार आहेत. ‘बृहन्महाराष्ट्र मंडळ अधिवेशन २०२१ शार्लेट अमेरिका’चे मुख्य संयोजक आणि ‘गर्जा मराठी’चे संस्थापक सदस्य संदीप पाध्ये, महाराष्ट्र राज्य साहित्य आणि संस्कृती मंडळाच्या सचिव मीनाक्षी पाटील, तसेच जगभरातील अनेक देशांतील आणि भारतातील अनेक राज्यातील महाराष्ट्र मंडळांचे आजी-माजी पदाधिकारी या उपक्रमामध्ये सहभागी होत आहेत. 

कोविड-१९च्या अनुषंगाने मानसिक आणि भावनिक आरोग्याबरोबर शैक्षणिक जागृती, असे या उपक्रमाचे स्वरूप आहे. २५ मे रोजी हा जागृती संदेश ४२ देश, अमेरिकेतील विविध राज्ये. भारतातील विविध राज्ये आणि महाराष्ट्रातील विविध शहरांमधून एकाच दिवशी लाखो लोक शेअर करतील आणि त्यापुढील ७२ तासांत तो जगभर मोठ्या प्रमाणावर पाठवला जाईल. किमान एक कोटी मराठी भाषकांनी या महाजागरामध्ये सहभागी व्हावे या दृष्टीने जगभरातील विश्व मराठी परिषदेचे समन्वयक प्रयत्न करत आहेत.

जग सध्या एका अनाकलनीय, भीषण आणि भयकंपित अशा परिस्थितीतून जात आहे. जगभरातील मराठी भाषक या प्रसंगी एकत्र असून, ते परस्परांना आधार देत जागृती निर्माण करणार आहेत, अनुभवांची देवाणघेवाण करणार आहेत. सध्याही ते गप्पा मारत आहेत, लेखन करत आहेत, कविता लिहीत आहेत, सर्जनशील निर्मिती करीत आहेत, आपल्या भावनांना वाट करून देत आहेत, मन मोकळे करत आहेत आणि धीराने या महाभयंकर संकटाचा सामना करत आहेत. मुख्य म्हणजे हे सर्व जण सर्वसामान्य मराठी नागरिक आहेत. यात कोणी सेलिब्रिटी अथवा राजकारणी नाही. सामान्य माणसांनी एकत्र येऊन एकमेकांना दिलेला मानसिक आणि भावनिक आधार असे या महाजागराचे स्वरूप आहे.

कोविड-१९ महामारीशी लढताना शारीरिक आरोग्याबरोबरच मानसिक आरोग्य सुदृढ राखणे आवश्यक आहे. अशा वेळी जगभरातील मराठी भाषकांचे ऐक्य, बंधुभाव आणि संवाद यांचा हा अभूतपूर्व आविष्कार असेल. विशेष म्हणजे या उपक्रमाद्वारे कोविड-१९ काळातील जगभरातील मराठी बांधवांच्या संवादाचे एक महत्त्वपूर्ण असे दस्तावेजीकरणही होईल. शारीरिक आरोग्याबरोबर मानसिक आरोग्य, जागृती, दस्तावेजीकरण, सर्जनशील कल्पनांचा आविष्कार आणि विश्वसंवाद असे या उपक्रमाचे अपेक्षित फलित आहे, असे प्रतिपादन विश्व मराठी परिषदेचे प्रमुख मार्गदर्शक डॉ. श्रीपाद भालचंद्र जोशी यांनी केले आहे. 

एखाद्या भाषिक समूहाने एकत्र येऊन अशा प्रकारे संवेदनशीलतेचा आणि एकत्वाचा एकाच वेळी महाजागर करायचा आणि सामूहिक मानसिक, भावनिकतेला बळ द्यायचे ही जगातील वेगळीच घटना असेल.

जगभरातील विविध देशांतील महाराष्ट्र मंडळे, सांस्कृतिक मंडळे, मराठी संस्था, मराठी भाषा आणि संस्कृती संवर्धन संस्था, मराठी कट्टे आदी या उपक्रमात सहभागी होत आहेत. अमेरिकेतील आर्सी फाउंडेशन यासाठी विशेष साह्य करत आहे. या महाजागरामध्ये सहभागी होण्यासाठी www.vishwamarathiparishad.org या संकेतस्थळाला भेट द्यावी आणि ७०६६२ ५१२६२ या परिषदेच्या व्हॉट्सअॅप क्रमांकावर संपर्क साधावा. या महाजागराशी संबंधित व्हिडिओ विश्व मराठी वाणी या यू-ट्यूब चॅनेलवर प्रसिद्ध झाला आहे. (व्हिडिओ शेवटी दिला आहे.) 

देश-विदेशातील अधिकाधिक मराठी भाषकांनी या महाजागरामध्ये सहभागी व्हावे, असे आवाहन विश्व मराठी परिषदेचे संस्थापक अध्यक्ष प्रा. क्षितिज पाटुकले आणि अनिल कुलकर्णी यांनी केले आहे.